Vai a sottomenu e altri contenuti

Progetu “Barigadu solidale” incontru informativu in Busache su 27 de abrile 2022

S'Unione de sos Comunes de Barigadu pro mesu de su Servìtziu Sotziale Assotziadu cheret promòvere su progetu ''Barigadu Solidale''.

Mèrcuris su 27 de abrile 2022 a sas 16.30 in sa sea de s'Unione de sos Comunes in Busache, localidade Giolantine s'at a fàghere un'atòbiu informativu pro totu sos assòtzios e totu sos tzitadinos interessados de sos Comunes de Ardaule, Bidoniu, Busache, Fordongianus, Neoneli, Samugheo, Sorradile e Ula.

A chi est destinadu su progetu:

Su progetu est destinadu a sos tzitadinos residentes in sos Comunes de Ardaule, Bidoniu, Busache, Fordongianus, Neoneli, Samugheo, Sorradile e Ula. Cheret èssere una manera pro agiudare a sos tzitadinos, e prus ancora a cussos chi nde tenent prus bisòngiu, ca in su prus de custos Comunes mancant sos servìtzios essentziales e a bortas si tirat a innantis gràtzias a sa disponibilidade e a su bonu coro chi ancora esistit in biddigheddas piticas che a cussas de su Barigadu.

Cale sunt sos obietivos de su progetu:

§ Fraigare una RETE DE VOLUNTARIADU intra sos comunes, pro mòvere sa cussèntzia de sos tzitadinos de totu sos comunes

§ Agiudare a sos tzitadinos chi non tenent parentes e nemos chi ddos potzat agiudare, dende a issos unu servìtziu de assistèntzia

§ Dare una manu de agiudu a sos servìtzios sotziales

Sas atziones de su progetu:

1. Traballare a manos de pare cun sos assòtzios de voluntariadu locale de ònnia comune

2. Fàghere atòbios informativos pro sensibilizare a sas resursas e a sa populatzione

3. Fàghere cursos de formatzione pro sos voluntàrios

4. Fraigare una rete intercomunale de voluntariadu e cumentzare a traballare ativende un'isportellu solidale in ònnia Comunu

5. Fàghere atòbios in sas iscolas pro sensibilizare a sos pitzocheddos a sos temas de sa solidariedade e de sa collaboratzione

S'ispera est chi ddoe pighet parte gente meda.

Abbàida sa locandina de s'atòbiu

a.f.

torna all'inizio del contenuto
torna all'inizio del contenuto